लमजुङमा लक्ष्यभन्दा बढी बालबालिकाले लगाए दादुरा रूवेलाकाे खाेप !

लमजुङ । लमजुङमा ९ हजार भन्दा बढी बालवालिकाले दादुरा रुवेला विरुद्धको खोप लगाएका छन् । फागुन १३ गतेबाट सुरु भएको दादुरा रुवेला विरुद्धको खोप अभियान जिल्लाका सवै स्थानीय तहहरुमा सम्पन्न भएको छ । अभियानका क्रममा जिल्लामा पाँच वर्ष मुनिका नौ हजार चार सय २० जना बालवालिकालाई खोप लगाइएको छ । 

स्वास्थ्य कार्यालय लमजुङका अनुसार स्थानीय तहमा निर्धारित लक्ष्य भन्दा बढि बालबालिकाले दादुरा रुवेला विरुद्धको खोप लगाएका छन् । जिल्लाका सवै स्थानीय तहमा ६ हजार सातसय ३१ बालबालिकालाई खोप लगाउने लक्ष्य राखिएको थियो । 

कार्यालयका अनुसार १३ गतेबाट खोप अभियान सुरु भएको बेसीशहर नगरपालिकामा दुईहजार आठसय ६ जना बालबालिकाले खोप लगाएका छन् । सुन्दरवजार नगरपालिकामा दुईहजार एकसय २३ जना, मध्यनेपाल नगरपालिकामा एकहजार तीनसय २४ जना र राइनास नगरपालिकामा ८ सय ८२ जना बालबालिकाले खोप लगाएको स्वास्थ्य कार्यालय लमजुङले जनाएको छ । 

गाउँपालिका तर्फ दोर्दी गाउँपालिकामा सातसय ५० जना, मर्स्याङ्दी गाउँपालिकामा सातसय ७८ जना, दुधपोखरी गाउँपालिकामा तीनसय ७४ जना र क्होलासोँथार गाउँपालिकामा तीनसय ७९ बालबालिकाले खोप लगाएका छन् । 

जिल्लामा फागुन १३ गते देखि सुरु भएको अनियान अन्तर्गत पहिलो चरणमा बेसीशहर, सुन्दरवजार, मर्स्याङ्दी, दोर्दी र दुधपोखरी गाउँपालिकामा खोप लगाइएको थियो भने दोस्रो चरणमा राइनास, मध्यनेपाल र क्व्होँलासोँथरमा खोप अभियान सञ्चालन भएको थियो ।   

खोप अभियानका क्रममा नियमित छुटेका खोप पनि बालबालिकालाई लगाइएको स्वास्थ्य कार्यालयले जनाएको छ । सरकारले सन् २०२६ सम्म दादुरा–रूबेला निवारण गर्ने लक्ष्यका साथ खोप अभियान सञ्चालन गरेको हो । दादुरा–रूबेला सवैभन्दा बढी संक्रामक रोग भएको र एक व्यक्तिले १८ जनासम्म यो रोग सार्न सक्ने जोखिम भएकोले यस वर्ष देशभरी नै खोप अभियान सञ्चालन गरीएको मन्त्रालयले जनाएको छ ।