लमजुङ– डुम्रे बेसीसहर सडकअन्तर्गत लमजुङको पाउदीदेखि सदरमुकाम बेसीसहरसम्म लगत कट्टाको तयारी भएको छ । डुम्रे बेसीसहर चामे सडक योजनाले सो सडक खण्डको पाउदीदेखि बेसीसहरसम्म सडक दायाँबाँया १०/१० मिटर हुनेगरी लगत कट्टा गर्न लागेको हो ।
सडक योजनाले जिल्लास्थित मालपोत कार्यालय र नापी कार्यालयलाई पत्राचार गर्दै पाउदीदेखि बेसीसहरसम्मको सडक दायाँबाँया १०/१० मिटर हुनेगरी लगत कट्टा गराई डुम्रे बेसीसहर चामे सडक योजनाको नाममा जग्गाधनी प्रमाणपत्र पुर्जा बनाउन आग्रह गरेको हो । २०३४ सालको नेपाल रजपत्रभाग ३ मा उल्लेख भएबमोजिम जिल्ला सडकको मापदण्ड दायाँबाँया १०/१० मिटर कायम भएको र सोहीअनुसार लगत कट्टा गरिदिन सम्बन्धित निकायमा आग्रह गरिएको डुम्रे बेसीसहर चामे सडक योजनाले जनाएको छ ।
सडक मापदण्ड लगतकट्टाको विषयमा मालपोत कार्यालय र नापी कार्यालयमा पठाइएको पत्रको बोधार्थ जानकारी जिल्ला प्रशासन कार्यालय, बेसीसहर नगरपालिका र सुन्दरबजार नगरपालिकामा पनि पठाइएको छ । सडक योजनाले पत्राचार गरे पनि लगतकट्टाको काम भने सुचारु हुन सकेको छैन । लगतकट्टाका लागि अध्ययनसहितको प्राविधिक तयारी गर्नुपर्ने भएकाले तत्कालै काम सुचारु हुन नसकेको मालपोत कार्यालयले जनाएको छ ।
छिमेकी जिल्ला तनहुँको डुम्रे बजारबाट विसं २०२९ मा खन्न सुरु भएको उक्त सडक बेसीसहरसम्मको ४२ किलोमिटरसम्म पुर्याउन झण्डै १५ वर्ष लागेको थियो । विसं २०४६ मा ट्रयाक खुलेसँगै विसंं २०५२ देखि सिङ्गल लेनको कालोपत्र सुरु भएको थियो । सुरु गरेको चार वर्षको अवधिमा ४२ किलोमिटर सडक कालोपत्र भएकोे थियो । कालोपत्रे भएपछि समय समयमा मर्मत सम्भार हुन नसक्दा सडक जीर्ण बन्दै गएको स्थानीयवासीको भनाइ थियो ।
उक्त सडकमा दैनिक सयौं संख्यामा साना तथा ठूला सवारीसाधन आवतजावत गर्दै आएका छन् । डुम्रे बेसीसहर सडक हुँदै हिमाली जिल्ला मनाङका बासिन्दासमेत आवतजावत गर्दै आएका छन् । केही वर्ष अघिदेखि डुम्रे–बेसीसहर सडक दुई लेनको बनाउन थालिएको छ । छिमेकी जिल्ला तनहुँको डुम्रे बजारदेखि लमजुङतर्फ निर्माण सुरु भएको सो सडक पहिलो चरणमा आठ दशमलव तीन किलोमिटर चाम्बाससम्म दुई लेन सडक बनाउन थालिएको हो ।
सडक योजनाका अनुसार लगत कट्टाभएको १०/१० मिटर जमिनमध्ये चौडाइ ११ मिटरमा सडकको संरचना बन्ने भएको छ । यसअघि तीन दशमलव ७५ मिटरको भारवाहन रहेको सो सडक दुई लेनको भएसँगै अब सात मिटरको हुने आयोजनाले जनाएको छ । दायाँबायाँ एक/एक मिटरको ‘सोल्जर’ तथा एक/एक मिटरको नाली निर्माण हुने आयोजनाले जनाएको छ ।
डुम्रे बेसीसहर सडक ४२ किलोमिटर रहेको छ । यस सडकको लमजुङ खण्ड पाउदीदेखि बेसीसहरसम्म १८ किलोमिटर र तनहुँ डुम्रेदेखि लमजुङको सिमाना पाउदी बजारसम्म २४ किलोमिटर छ ।
