बेसीसहरको खर्च एक चौथाइमात्रै !

लमजुङ । लमजुङ सदरमुकाममा रहेको बेसीसहर नगरपालिकाले चालु आर्थिक वर्षको ६ महिनामा एक चौथाइ मात्रै खर्च गरेको छ । आर्थिक वर्ष २०८०/८१ मा विनियोजित बजेटमध्ये पुस मसान्तसम्म २८.५८ प्रतिशत मात्रै खर्च भएको हो । नगरपालिकाले चालु आर्थिक वर्षमा विभिन्न शीर्षकमा विनियोजन गरेको बजेट ७७ करोड ५० लाखमध्ये २२ करोड १५ लाख रुपैयाँ खर्च भएको जनाएको छ ।

सार्वजनिक गरेको विवरण अनुसार पहिलो अर्धवार्षिक अवधिमा चालुतर्फ ३५.६७ प्रतिशत र पुँजीगततर्फ १४.४ प्रतिशत खर्च भएको छ । नगरपालिकाले चालुतर्फ कुल बजेट ५२ करोड १० लाखमध्ये १८ करोड ५९ लाख खर्च भएको जनाएको छ । त्यस्तै पुँजीगततर्फ २५ करोड ३९ लाख बजेट रहेकोमा तीन करोड ५६ लाख रुपैयाँ खर्च भएको छ ।

नगरपालिकाको क्षेत्रगत खर्च विवरण अनुसार आर्थिक विकासमा १६.२ प्रतिशत मात्रै खर्च भएको छ । सामाजिक विकासतर्फ ३९.३६ प्रतिशत खर्च भएको छ । पूर्वाधार विकासतर्फ १३.९२ प्रतिशत खर्च भएको छ । सुशासन तथा अन्तरसम्वन्धित क्षेत्रमा ५.४६ प्रतिशत र कार्यालय सञ्चालन तथा प्रशासनिक क्षेत्रमा ३०.४२ प्रतिशत खर्च भएको नगरपालिकाले जनाएको छ ।

पुँजीगततर्फ ६ करोड ६१ लाख बजेट विनियोजन भएकोमा एक करोड सात लाख खर्च भएको छ । सामाजिक विकासतर्फ ३५ करोड ४१ लाख बजेट विनियोजन गरेकोमा १३ करोड ९५ लाख खर्च भएको छ । पूर्वाधार विकासतर्फ १९ करोड १० लाख बजेट विनियोजन भएकोमा २ करोड ६५ लाख खर्च भएको छ । सुशासन तथा अन्तरसम्वन्धित क्षेत्रका लागि २ करोड विनियोजन भएकोमा १० लाख रुपैयाँ खर्च भएको छ ।

कार्यालय सञ्चालन तथा प्रशासनिक कार्यका लागि विनियोजित १४ करोड ३६ लाखमध्ये चार करोड ३६ लाख खर्च भएको नगरपालिकाले जनाएको छ । नगरपालिकाको वडागत खर्च विवरण अनुसार वडा नम्वर– १ ले ९.१ प्रतिशत मात्रै खर्च गरेको छ भने वडा–२ ले १९.३९, वडा ३ ले ९.५७ प्रतिशत खर्च गरेको छ । त्यसैगरी वडा ४ ले १.५९ प्रतिशत, वडा ५ ले २०.६६ प्रतिशत, वडा ६ ले २४.९ प्रतिशत, वडा ७ ले १०.१ प्रतिशत खर्च गरेको छ ।

वडा ८ ले २१.१९ प्रतिशत, वडा १० ले ९.१६ प्रतिशत र वडा ११ ले ४.७५ प्रतिशत मात्रै खर्च गरेको छ । नगरपालिकाबाट हुने खर्चमध्ये २३.५६ प्रतिशत खर्च भएको नगरपालिकाले सार्वजनिक गरेको विवरणमा उल्लेख छ । नगरपालिकाले सार्वजनिक सुनुवाई कार्यक्रममा पहिलो अर्धवार्षिक प्रगति विवरण सार्वजनिक गरेको थियो ।