नाइँचेमा सामुदायिक स्वास्थ्य इकाई स्थापना भएपछि स्थानीय खुसी

लमजुङ । मर्स्याङ्दी गाउँपालिका ६, बाहुनडाँडा नाइँचेमा सामुदायिक स्वास्थ्य इकाई स्थापना भएपछि स्थानीय खुसी भएका छन् ।

साविकको बाहुनडाँडा गाविसलाई पायक पर्ने गरी बाहुनडाँडामा स्वास्थ्य चौकी स्थापना गरिएको थियो । उक्त ठाउँ पुग्न पनि समय लाग्ने भएपछि नाइँचेबासीले सामुदायिक स्वास्थ्य इकाईको माग गरेका थिए । गाउँमै स्वास्थ्य संस्था स्थापना भएपछि गाउँले खुसी भएका छन् ।

नागरिकलाई गाउँमै आधारभूत स्वास्थ्य सेवा उपलब्ध गराउन गाउँपालिकाले नाइँचेमा सामुदायिक स्वास्थ्य इकाई स्थापना गरेको हो । स्वास्थ्य इकाईको बुधबार एक कार्यक्रमबीच उद्घाटन गर्दै गाउँपालिका अध्यक्ष अर्जुन गुरुङले नागरिकलाई नागरिककै घरदैलोमा आधारभूत सेवा दिन गाउँपालिका लागि परेको बताए।

आधारभूत स्वास्थ्य र शिक्षा नागरिकको आधारभूत अधिकार र आवश्यकता भएकाले स्वास्थ्य जस्तो संवेदनशील सेवालाई नागरिकको घरदैलोमै पुर्याउने हरदम प्रयास गरिएको उनले बताए।

मर्स्याङ्दी गाउँपालिका ६ का वडा अध्यक्ष मीनराशी गुरुङको अध्यक्षतामा भएको उद्घाटन कार्यक्रममा गाउँपालिकाका प्रमुख प्रशासकीय अधिकृत गौतम पंज्ञानी, सामाजिक विकास समिति संयोजक एवं वडा, वडा नं. ७ का वडा अध्यक्ष तिलबहादुर गुरुङ, स्वास्थ्य शाखा प्रमुख लुलबहादुर घलेलगायतको उपस्थिति थियो । कार्यक्रमको सञ्चालन बाहुनडाँडा स्वास्थ्य चौकी प्रमुख रमनाथ घिमिरेले  गरेका थिए ।

नाइँचे सामुदायिक स्वास्थ्य इकाईमा १ एक जना अहेव, १ जना अनमी र १ जना कार्यालय सहयोगी राखिएका छन् । स्वास्थ्य इकाईबाट हाल प्राथमिक स्वास्थ्य उपचार सेवा, खोप सेवा, परिवार नियोजन, गर्भवती जाँच र आधारभूत स्वास्थ्य सेवा प्रवाह गरिने गाउँपालिका स्वास्थ्य शाखा प्रमुख लुलवहादुर घलले जानकारी दिए ।

मर्स्याङ्दी गाउँपालिकामा हाल १० बेडको अस्पताल निर्माणाधीन अवस्थामा छ । गाउँपालिकाभरी ७ वटा स्वास्थ्य चौकी, २ वटा आधारभूत स्वास्थ्य केन्द्र र नाइँचेमा सहित ५ वटा सामुदायिक स्वास्थ्य इकाई सञ्चालनमा रहेका छन् ।