लमजुङ । संघीय शिक्षा ऐन २०८० को प्रस्तावित मस्यौदाको विरोध गर्दै लमजुङका शिक्षकहरू आन्दोलित भएका छन् ।
नेपाल शिक्षक महासंघ, नेपाल शिक्षक संघ, नेपाल राष्ट्रिय शिक्षक संगठन, एकीकृत अखिल नेपाल शिक्षक संगठन, नेपाल राष्ट्रिय शिक्षक परिषद, अखिल नेपाल शिक्षक संगठन लगायतका विभिन्न दल निकट शिक्षकका संघ संगठनहरूले सयुक्त रुपमा जिल्ला शिक्षा विकास तथा समन्वय इकाईमा धर्ना तथा आन्दोलन कार्यक्रम गरिरहेका छन्।
शिक्षकहरूको आधिकारिक ट्रेड युनियन नेपाल शिक्षक महासंघ केन्द्रीय समितिको घोषित विरोध कार्यक्रम अनुसार मंगलबार शिक्षा समन्वय समिति लमजुङमा धर्ना र ज्ञापनपत्र दिएका छन् ।
नेपाल शिक्षक संघ लमजुङको अध्यक्ष तिर्थराज न्यौपाने, नेपाल राष्ट्रिय शिक्षक संगठन बेसीशहर नगर कमिटि अध्यक्ष बसन्त अधिकारी, नेपाल शिक्षक संघ बेसीशहर पालिका अध्यक्ष एकदेव घिमिरे, एकिकृत अखिल नेपाल राष्ट्रिय शिक्षक संगठन बेसीशहर नगर कमिटि अध्यक्ष गमबहादुर दनाईले संयुक्त रुपमा ज्ञापनपत्र बुझाएका हुन् ।
आन्दाेलित शिक्षकहरूले आईतबार लमजुङका ८ वटै स्थानीय पालिकाको कार्यालयमा बिहान ११ देखि दिउँसो २ बजेसम्म धर्ना दिनुकाे साथै ज्ञापनपत्र दिएका थिए।
सरकारले प्रस्तावित संघीय शिक्षा ऐनमा शिक्षा, शिक्षक र विद्यालय कर्मचारी विरोधी प्रावधान राखेकोले देशभरीका शिक्षकहरू आन्दोलित भएको नेपाल शिक्षक महासंघ लमजुङका अध्यक्ष तीर्थराज न्याैपानेले बताए ।
नेपाल शिक्षक संघ गण्डकीका महासचिव शिवराज अधिकारीका अनुसार साउन ३२ गते प्रदेश स्थित सामाजिक विकास मन्त्रालयमा धर्ना दिने कार्यक्रम छ । यसपटक टुक्रे र विभाजित आन्दोलन गर्नुभन्दा एकताबद्ध भएर सशक्त आन्दोलन गरि टुङ्गोमा पुग्ने उनले बताए ।
नेपाल राष्ट्रिय शिक्षक संगठन लमजुङका अध्यक्ष हस्तबहादुर गुरूङले सरकारले प्रस्तावित शिक्षा ऐनमा भएका शिक्षक तथा कर्मचारीको हित विपरीतका व्यवस्थाहरू सुधार नगरे कडा आन्दोलन थालिने चेतावनी दिए।
विगतमा नेपाल सरकार, शिक्षा विज्ञान तथा प्रविधि मन्त्रालय र नेपाल शिक्षक महासंघबीचमा भएको ५१ बुँदे सम्झाैता बमोजिमको शिक्षा ऐन ल्याउन दवाव दिन आन्दाेलन गरिएकाे एकीकृत अखिल नेपाल शिक्षक संगठन लमजुङका अध्यक्ष सीताराम अधिकारीले बताए ।
नेपाल शिक्षक संघ लमजुङका अध्यक्ष सुर्यबहादुर केसीले विद्यालयकाे पढाई प्रभावित नहुनेगरी आन्दोलनका कार्यक्रम गरिएकाे जानकारी दिए ।
