लमजुङ । भीरमह काढेर फर्किने क्रममा दोर्दी गाउँपालिका ६, ताँजेका ४८ वर्षीय ठागु घले पहराबाट दोर्दीखोलामा खसेर बेपत्ता भएका छन् ।
ठाउँ अप्ठ्यारो भएका कारण खोजी गर्न नसकेपछि स्थानीयले प्रहरीलाई खबर गरेका थिए । केही दिनअघि १५ जनाको टोली भीर मह काढेर गाउँ फर्किने क्रममा दोर्दी गाउँपालिका ७, को महखर्क नजिकैको पहरोबाट घले दोर्दीखोलामा खसेका हुन्।
सुपर दोर्दी जलविद्युत आयोजना ‘ख’ को ड्यामक्षेत्रदेखि मुस्किलले ४ घण्टामा हिँडेर पुगिने उक्त ठाउँ भिरालो रहेको र दोर्दीखोलाको खोँच अप्ठ्यारो ठाउँमा रहेकाले बेपत्ता भएकाको अवस्थाबारे जानकारी प्राप्त हुन नसकेको दोर्दी गाउँपालिका अध्यक्ष युवराज अधिकारीले बताए । उनका अनुसार खबर पाएसंगै गाउँबाट खोजीकार्यका लागि युवाहरु खटिएको र संयुक्त सुरक्षाफौजको टोली शुक्रबार घटनास्थलतर्फ गएको छ ।
जिल्ला प्रहरी कार्यालय प्रमुख प्रहरी नायव उपरीक्षक प्रकाश श्रीमलले घटनाबारे बिहीबार राती जानकारी आएको र शुक्रबार त्यसतर्फ संयुक्त सुरक्षा फौज गएको बताए ।
खोँचमा खसेका व्यक्तिको उद्दारका लागि उदिपुरस्थित नेपाली सेनाको चण्डीप्रसाद गणका क्याप्टेन, नेपाल प्रहरीका प्रहरी नायव निरीक्षक र सशस्त्र प्रहरी बल आश्रित गुल्म रानीकुवाका प्रहरी सहायक निरीक्षकसहित १७ जनाको सुरक्षा टोली घटनास्थल पुगेकाे छ । संयुक्त सुरक्षा फौजसंगै स्थानीयले शनिबार बिहानदेखि खोजतलास थालेको प्रहरीले जनाएको छ ।
