लमजुङको पसगाउँमा माघ २४ र २५ मा १३ औं महोत्सव हुँदै

लमजुङको क्व्होलासोंथार गाउँपालिका ६, मा पर्ने पर्यटकीय गाउँ पसगाउँमा यही माघ २४ र २५ गते १३ औं महोत्सव हुने भएको छ ।

पसगाउँको प्रचारप्रसारका लागि गाउँले महोत्सवको आयोजना गर्न लागेको हो । समुद्री सतहदेखि १ हजार ६ सय ५० मिटर उचाईमा अवस्थित पसगाउँ गुरुङ जातिको बाहुल्यता रहेको गाउँ हो । गुरुङ जातिको कला संस्कृति, भेषभूषा र भाषाको संरक्षण र संवद्र्धन गर्दै निम्नस्तर आय भएका जनताको आर्थिक एवं सामाजिक जिवनस्तर उकास्ने ध्येयले महोत्सव आयोजना गर्न लागिएको पसगाउँ सामुदायिक होमस्टेले बुधबार बेंसीसहरमा पत्रकार सम्मेलन गरी जानकारी गराएको थियो ।

होमस्टे अध्यक्ष बलराम गुरुङका अनुसार वि.सं. २०६० साल बैशाख १६ र १७ गते प्रथम पसगाउँ महोत्सव आयोजना गरिएको थियो । पछिल्लो समय कोभिड संक्रमण जोखिमका कारण निरन्तरता दिन नसकेको महोत्सवमार्फत ग्रामीण पर्यटनको विस्तार गर्न, लोक संस्कृतिको संरक्षण एवं संवद्र्धन गर्न, स्थानीय हस्तकला प्रर्दशनी गर्न, पसगाउँलाई देश विदेशमा थप चिनाउने उद्देश्यले पसगाउँ महोत्सवको १३ औं संस्करणको आयोजना गर्न लागिएको अध्यक्ष गुरुङले बताए।

वि.सं. २०६० सालदेखि पसगाउँमा पर्यटन प्रवद्र्धन गर्ने उद्देश्यका साथ महोत्सवको आयोजना संगसंगै आन्तरिक पर्यटकहरुको आगमनमा बृद्धि हुन थालेको थियो । ग्रामीण पर्यटनले बामे सरेकै बेला १० वर्षे माओवादी जनयुद्धले ओझेलमा पर्न गएकोमा २०६२/०६३ को जनआन्दोलपछि पर्यटक आगमन सुरु भइरहेकोमा कोभिड संक्रमण जोखिमले समस्या बनाएको थियो । अहिले कोभिड १९ को सामान्यीकरण हुँदै गएकाले विस्तारै ग्रामीण पर्यटन व्यवसाय लय तर्फ फर्कंदै गरेको अवस्थामा महोत्सव आयोजना गर्न लागिएको आयोजकले जनाएको छ ।

कूल १ सय ५३ घरधुरी रहेको यस गाउँमा ७ घर भुजेल एवं १२ घरधुरी दलितबाहेक सवै गुरुङका घर छन् । पसगाउँ घर भएका क्व्होलासोंथार गाउँपालिका अध्यक्ष समेत रहेका सूर्यप्रसाद गुरुङका अनुसार पसगाउँमा विकास निर्माणका कामहरु भइरहेका छन् । ग्रामीण पर्यटनको प्रवद्र्धन गर्न महोत्सवले ठूलो भूमिका खेल्ने उहाँले दावी गर्नुभयो । पसउगाउँमा हाल २१ घरमा होमस्टे संचालनमा रहेको छ । गाउँमा भूपू सैनिकहरुको अगुवाईमा क्व्होम्रेडाँडामा पिकनिक स्पटको निर्माण गरिएको छ । गाउँमा खानेपानी तथा विजुली वत्तीको पनि सुविधा छ ।

लमजुङ सदरमुकाम बेंसीसहरदेखि पालिका केन्द्र मालिङ, साल्मेभन्ज्याङ हुँदै पसगाउँ पुग्न सकिन्छ । पोखरादेखि रामबजार गिलुङ हुँदै, पोखरादेखि थुम्सीकोट हुँदै, तनहुँको दमौली भोर्लेटार गिलुङ हुँदै र बेंसीसहरदेखि घलेगाउँ भुजुङ हुँदै पसगाउँ पुग्न सकिन्छ । पत्रकार सम्मेलन कार्यक्रमको संचालन स्थानीय गोपाल गुरुङले गरेका थिए । कार्यक्रममा भूपू सैनिक आवासीय माविका प्रिन्सिपल विनोद गुरुङ, स्थानीय तिलप्रसाद गुरुङलगायतको उपस्थिति थियो।