नेकपा (एमाले) का उपमहासचिव एवं लमजुङका प्रतिनिधि सभाका उम्मेद्वार पृथ्वीसुब्बा गुरुङले सत्ता गठबन्धनको आँधीहुरीको सामना गर्न एमाले तयार रहेको बताएका छन् ।
लमजुङको मस्र्याङ्दी गाउँपालिकाका अगुवा कार्यकर्तालाई प्रशिक्षण दिँदै नेता गुरुङले सत्ता गठबन्धन सर्प, विच्छी र भ्याकुताको गठजोड भएको आरोप लगाए । उनले आफ्नो पार्टी ‘बाघ र बाज’ जस्तो भएकाले उनीहरुको सामना गर्न काफी रहेको बताए ।
‘गठबन्धनमा समाजवादी भन्नेहरु, संघियता विरोधी, दलाल पुँजीबादको पक्षपोषण गर्ने र क्षेत्रियतावादीहरु छन् । यो कहिँ नभएको जात्रा हाँडीगाउँमा भनेजस्तो, सर्प विच्छी, भ्याकुताहरुको गठजोड हो’, उनले भने, ‘यी सबैको सामना गर्न एमालेसँग सामथ्र्य छ । हामी बाघ र बाज जस्ता हौं, राजालाई लत्कार्न सक्ने मदन भण्डारीका चेला हौं ।’
उनले गठबन्धनका उम्मेद्वार नेकपा (माओवादी केन्द्र) का महासचिव देव गुरुङलाई १० हजार मतले पराजित गर्ने दावी गरे । ०७४ मा एमाले र माओवादीविच गठबन्धन गर्ने, चुनवापछि पार्टी एकतापनि गर्ने भनेकाले देव गुरुङलाई कँही उठ्ने ठाउँ नपाएपछि आफुँले लमजुङ ल्याएको उनले बताए ।
‘हिजो गठबन्धन गर्ने भनिहालियो, हामी एकता पनि गर्छौ चुनावपछि भनेकाले, एकता नभाँडियोस भनेर, कम्युनिष्ट एकताका लागि, काँग्रेसलाई हराएर कम्युनिष्टको सरकार बनाउन देव गुरुङलाई मनाङबाट ल्याएका हौं’, उनले भने, ‘नेपालीमा उखानै छ नि, एक दिनको पाउना मिठोमिठो खा, दुई दिनको पाउना जसोतसो खा, तीनदिनको पाउना जतासुकै जा भने जस्तो अब उनी जतासुकै जाउन । उनलाई पराजित गरेर छोड्नुपर्छ ।’
‘एक बाम एक ठाम भनेर ०४८ ल्याएर जिताउने प्रयास गयौं, २६ वर्षसम्म कता हराए हराए फेरी ०७४ मा ल्याएर जिताएर पठायौं’, देव गुरुङप्रति टिप्पणी गर्दै उनले भने, ‘जितेपछि कता हराए हराए, मैले जितेर मुख्यमन्त्री नभएको भए अलिअलि विकास पनि नहुने रहेछ । उहाँले लमजुङका लागि सिन्को भाँच्नुभएन, कार्यकर्ता चिन्नुछैन, जिल्लामा आउनु छैन, उल्टै काँग्रेसको बुई चढेर हामी माथि गीर खेल्न आउने ? अव पनि देव गुरुङलाई भोट हाल्नु भनेको कुकुरलाई मासु पैंचो दिएको जस्तो हो ।’
उनले आफुँ र आफ्नो पार्टीले जितेमा कस्तो विकास गर्ने भनेर नयाँ नयाँ र र्दीघकालिन योजना बनाएको सुनाए ।
नेकपा एमालेका केन्द्रीय सदस्य एवं लमजुङका इन्चार्ज मायानाथ अधिकारीले पृथ्वीसुब्बा गुरुङ ०३४ सालदेखि लमजुङको जनता र विकासका लागि निरन्तर लागिपरेको बताए । ‘उहाँ हिजोका दिनमा जितेपनि, हारेपनि यहाँका जनताको सुखदुख र विकासका लागि निरन्तर लागिरहनुभएको छ । जमीन्द्रमान घले र कृष्ण अधिकारी पनि पदमा रहँदा र नरहँदा पनि जनताको सेवामा तल्लिन हुनुहुन्छ । अरु त जितेपनि हारेपनि जिल्ला फर्कदैनन ।’
प्रदेश सभा (क) का उम्मेदवार जमीन्द्रमान घलेले आफुले जितेमा हिजोका दिनमा मुख्यमन्त्री हुँदा पृथ्वीसुब्बा गुरुङले थालेका अधुरा काम पुरा गर्ने बताए । बेरोजगारीको अन्त्य, विकास निर्माण, सुशासनका काम गर्ने उनले बताए ।
नेकपा एमाले गण्डकी प्रदेश कमिटिका सचिव धनन्जय दवाडीले कम्युनिष्ट आन्दोलन बचाउन, राष्ट्रियता बचाउन, संघीयता बलियो बनाएर देशको विकास र सम्वृद्धीका लागि एमालेका उम्मेदवारलाई जिताएर बहुमतको सरकार बनाउन आवश्यक रहेको बताए ।
