नेपाली कांग्रेस लमजुङले प्रतिनिधि सभा निर्वाचनका लागि १२ जनाको नाम उम्मेदवारमा सिफारिस गरेको छ । शुक्रबार बसेको जिल्ला कार्यसमिति बैठकले प्रतिनिधिसभाको उम्मेदवारका लागि प्रत्यक्षतर्फ ७ जना र समानुपातिकतर्फ ५ जनाको नाम सिफारिस गरेको हो ।
उम्मेदवारमा नाम सिफारिस हुनेमा जिल्ला सभापति डा. टकराज गुरुङ, पूर्व सभापति तुलसीनारायण श्रेष्ठ, संविधानसभा सदस्य चन्द्रबहादुर कुंवर, नेपाल सांस्कृतिक महासंघका अध्यक्ष तीर्थबहादुर थापा, नेताहरु विष्णुप्रसाद धिताल, यमबहादुर गुरुङ र डा. बासुदेव गिरी रहेका छन् ।
यस्तै समानुपातिकतर्फ कोपिला विक, कृष्णमाया विक, तिरकाशी गुरुङ, शुभनाथ मिश्र र गर्जबहादुर गुरुङको नाम सिफारिस भएको छ ।
पूर्व केन्द्रीय सदस्य दिलबहादुर घर्ती भने यसपटक जिल्लाबाट प्रत्यक्ष र समानुपातिक दुवैमा परेका छैनन् । उनी २०६४ र २०७४ को निर्वाचनमा लमजुङबाट पराजित भएका थिए ।
काँग्रेसबाट प्रतिनिधिसभामा उम्मेदवार सिफारिस भएपनि यहाँ नेकपा (माओवादी केन्द्र) का महासचिव देव गुरुङले सत्ता गठबन्धनबाट उठ्ने इच्छा देखाएका छन् । उनी सत्ता गठबन्धनको सिट बाँडफाँड कार्यदलमा क्रियाशिल छन् ।
नेपाली काँग्रेस लमजुङका सभापति डा. टकराज गुरुङले केन्द्रको निर्णयपछि जुन सिट छोड्नुपर्ने भएपनि आफुँहरु तयार रहेको बताए । ‘केन्द्रमा सिट बाँडफाँडको तयारी भैरहेको छ, हामी प्रतिनिधि या प्रदेश सभा जुन छोड्नपनि तयार छौं’, गुरुङले भने । प्रक्रियागत रुपमा अहिले सिफारिस भएका नामहरु गठबन्धन हुँदा केन्द्रबाट हेरफेर हुनसक्ने उनले बताए ।
काँग्रेस कार्यकर्ताहरुले आफ्नै पार्टीबाट उम्मेदवार हुनुपर्ने आवाज उठाएपनि नेतृत्व तह भने गठबन्धन गरेरै निर्वाचनमा जाने मुडमा छ । २०७४ को निर्वाचनमा बाम गठबन्धन हुँदा प्रतिनिधि सभा र प्रदेश सभाका तीनै सिट गुमाएको काँग्रेस यसपटक गठबन्धन गरेर भएपनि पुरानो साख फर्काउने मुडमा छ । २०७४ को निर्वाचनमा बाम गठबन्धनबाट प्रतिनिधि सभामा देव गुरुङले काँग्रेसका दिलबहादुर घर्तीलाई पराजित गरेका थिए ।
