लमजुङ । नेकपा एमालेका प्रदेश कमिटी सचिवालय सदस्य बमबहादुर थापाको निधन भएकाे छ । क्यान्सर पीडित थापाकाे उपचारका क्रममा शनिबार काठमाडौंमा निधन भएको हाे ।
छातीको क्यान्सरका कारण ३ महिनासम्म भारतको मेदान्त अस्पतालमा उपचार गरी फर्किएका ७१ वर्षीय थापाको शनिबार अपरान्ह ४ बजेतिर मनमोहन मेमोरियल अस्पतालमा निधन भएको हो ।
मर्स्याङ्दी गाउँपालिका ९, पामचोक निवासी थापा दिउँसो आफन्तहरुसंग कुराकानी गरिरहेकै समयमा काठमाडौंस्थित घरमा अचानक ढलेपछि उपचारको लागि मनमोहन मेमारियल अस्पताल लगिएको थियो । अस्पताल लानेवित्तिकै उनलाई डाक्टरले मृत घोषणा गरेका थिए ।
थापा नेकपा एमालेबाट २०४९ र २०५४ को स्थानीय निर्वाचनमा साविक सिम्पानी गाविस अध्यक्षमा निर्वाचित भएका थिए । भारतीय सेनाको सेवाबाट २०३९ सालमा सेवा निबृत्त भएपछि उनी शिक्षण पेशामा आवद्ध भएका थिए । शिक्षण पेशासंगै उनी मालेको राजनीतिमा लागेका थिए ।
२०४६ सालमा प्रजातन्त्रको पुनः स्थापनासंगै शिक्षण पेशा त्यागेर उनी पूर्णकालीन रुपमा राजनीतिमा होमिएका थिए । २०४६ सालको प्रजातन्त्र पुनःस्थापनाको आन्दोलनमा सक्रिय भूमिका निर्वाह गरेका थापा २०४२ सालमा तत्कालीन राष्ट्रिय पञ्चायतमा भएको बमकाण्डमा पक्राउ समेत परेका थिए।
नेकपा एमालेको तत्कालीन इलाका संयोजक हुँदै जिल्ला कमिटी सदस्य, सचिवालय सदस्य भएका उनी नेकपा एमालेको अञ्चल कमिटी सदस्य र प्रदेश कमिटी सचिवालय सदस्य समेत भएका थिए । नेकपा एमालेको जनवर्गीय संगठन अखिल नेपाल किसान महासंघको केन्द्रीय सदस्य समेत भएका उनले साँढे ५ दशक पार्टीको विभिन्न जिम्मेवारीमा रहेर सक्रिय राजनीति गरेका थिए ।
लमजुङ विद्युत उपभोक्ता संस्थाकाे कार्यबहाक अध्यक्ष समेत भएका उनीले खुदी जलविद्युत आयोजना सरोकार समितिको अध्यक्ष भएरसमेत काम गरे ।
थापाको निधनप्रति नेकपा एमालेका नेता तथा कार्यकर्ताले दुःख व्यक्त गर्दै नेकपा एमालेले एकजना कर्मठ योद्दा गुमाएको उल्लेख गरेका छन् । नेकपा एमाले जिल्ला कमिटी अध्यक्ष कृष्णप्रसाद अधिकारीले थापाको निधनले पार्टीमा अपुरो क्षति पुगेको बताए ।
थापाको निधन भएपछि नेकपा एमाले जिल्ला कमिटी लमजुङले जेठ १५ गते गणतन्त्र दिवसको अवसरमा आयोजना गर्न लागेको पार्टीका पूर्व जन प्रतिनिधि सम्मान कार्यक्रम र जेठ १६ गते आयोजना गर्ने भनिएको जनवर्गीय संगठनका जिल्ला स्थित केन्द्रिय सदस्यहरुको परिचयात्मक अन्तरक्रिया कार्यक्रम हालका लागि स्थगित गरिएको छ ।
थापाका श्रीमती, २ छोरा, ५ छोरी र १५ जना नातिनातिना छन् । उनका कान्छा छोरा विकास थापा, छाेरी ज्वाईँहरू अस्ट्रेलियाबाट आएपछि साेमबार पशुपति आर्यघाटमा अन्तिम संस्कार गरिने परिवारले जनाएकाे छ ।
पाँच दलीय गठबन्धन हराएका पीएससँग कांग्रेस र रास्वपा आमनेसामने
लमजुङ । १२ वर्षपछि राजनीतिक दलहरुविच एक्ला–एक्लै प्रतिष्प्रर्धा हुन लागेपछि लमजुङमा राजनीतिक माहोल गर्माएको छ । यसो त तीन वर्षअघि...
