लमजुङको मर्स्याङ्दी गाउँपालिका वडा नं. ३ खुदीमा प्रहरीको नागरिक सुनुवाई कार्यक्रम सम्पन्न भएको छ । स्थानीय शान्ति सुरक्षा व्यवस्थापन र प्रहरीको काम कारवाही सम्वन्धी नागरिकको सुझाव लिन जिल्ला प्रहरी कार्यालय लमजुङले नागरिक सुनुवाई गरेको हो ।
कार्यक्रममा जिल्ला प्रहरी कार्यालय लमजुङका प्रमुख एवं प्रहरी नायव उपरीक्षक प्रकाश श्रीमलले प्रहरीले सम्पादन गरेका महत्वपूर्ण कार्यक्रमको बारेमा जानकारी गराएका थिए । प्रनाउ श्रीमलले प्रहरीले नागरिक मैत्री प्रहरी सेवा प्रदान गरिरहेको र जनगुनासोको तत्काल सम्बोधन हुनेगरि काम गर्ने प्रतिवद्धता जनाए ।
प्रमुख जिल्ला अधिकारी रामकृष्ण अधिकारीले जनताको समस्या राष्ट्रसेवकको पनि समस्या भएकाले गम्भिर रुपमा लागेर समस्याको समाधान गर्ने र यसका लागि नागरिक समाजको समेत महत्वपूर्ण भूमिका हुने बताए । नागरिकता वितरण, राष्ट्रिय परिचयपत्र वितरण, विकास निर्माणका काममा भईरहेका ढिलासुस्ती, राहत वितरणमा भएका ढिलासुस्ती लगायतका समस्याको तत्काल समाधानमा आवश्यक समन्वय र पहल गर्ने प्रजिअ अधिकारीको भनाई थियो ।
कार्यक्रमका सहभागीहरुले खुदीमा रहेको प्रहरी चौकीको स्तरोन्नती गरी ईलाका प्रहरी कार्यालय बनाउन माग गरेका थिए । यसैगरी लागुऔषध दुर्वब्यसनी, घरेलु हिंसा, घरेलु मदिरा नियन्त्रण, प्रहरी गस्ती लगायतका विषयमा जोड दिएका थिए ।
त्यसैगरी जिल्ला प्रशासन कार्यालयद्वारा प्रदान गरिने सेवा अन्तर्गत नागरिकता वितरण, राष्ट्रिय परिचयपत्र वितरण, विभिन्न प्राकृतिक विपदमा परि पीडित भएका परिवारलाई राहत उपलव्ध गराउनका लागि समेत पहल गरिदिन सहभागीहरुले माग गरेका थिए । बेसीशहर चामे सडक समयमै निर्माण नहुँदा नागरिकले सास्ती भोग्नुपरेको सहभागीहरुको गुनासो थियो ।
कार्यक्रममा मस्र्याङदी गाउँपालिका उपाध्यक्ष जुना थापा, पुर्वउपाध्यक्ष होमबहादुर विक, सशस्त्र प्रहरी नायव उपरिक्षक मानबहादुर शाही, मस्र्याङदी–५, का वडा अध्यक्ष घनश्याम घले लगायतले मन्तव्य राखेका थिए । प्रजिअ अधिकारीको अध्यक्षतामा भएको सो कार्यक्रममा मस्र्याङ्दी गाउँपालिका वडा नं. ३ का वडाध्यक्ष दुधमान तामाङले स्वागत मन्तव्य राखेका थिए भने कार्यक्रमको सहजिकरण प्रहरी निरिक्षक बुद्धि सुवेदीले गरेका थिए ।
