लमजुङ । लमजुङ र गोरखा जोड्ने कुनाघाट स्थित चेपे नदी भच्चेक सडक पुल निर्माणले दुई जिल्लाका नागरिकलाई सहज बनाएको छ ।
पूर्वी लमजुङको दुधपोखरी गाउँपालिका र गोरखाको अजिरकोट गाउँपालिका जोड्ने सो मोटरेवल पुल निर्माण सम्पन्न भएपछि दुई जिल्लाका नागरिकलाई यातायात आवतजावतमा सहज भएको हो ।
पुल निर्माणका लागि २०७८ साल असार ९ गते काष्ठमण्डव कन्ट्रक्सन प्रालिले पुर्वाधार विकास कार्यालय लमजुङसँग सम्झौता गरेको थियो । कुल चार करोड ३७ लाखको लागतमा ४० मिटर लम्वाइको पुल निर्माण भएको पूर्वाधार विकास कार्यालय लमजुङका प्रमुख विवेक सिग्देलले जानकारी दिनुभयो ।
२०८१ साल जेठमा पुल निर्माण भएसँगै स्थानीयहरुलाई आवतजावतसँगै दैनिक उपभोग्य सामान ढुवानीमासमेत सहज भएको छ । कृषि उत्पादनलाई बजारसम्म ढुवानी गर्नपनि सहज हुने भन्दै स्थानीयहरु खुशी भएका छन् । दैनिक उपभोग्य सामान ढुवानीका लागी पनि स्थानीयहरुलाई पुलले सहज बनाइदिएको छ ।
स्थानीय गोविन्द न्यौपानेले पुल निर्माणले दुबै जिल्लालाई विकासले जोडेको बताउनुभयो । “लमजुङको दुधपोखरी र गोरखाको अजिरकोट दुर्गम र बिकट क्षेत्र नै हो, यी दुई पालिकालाई पल निर्माणले विकाससँग जोडेको छ”, न्यौपानेले भन्नुभयो, “सडकसँगै विद्युत लगाएतका पुर्वाधार पनि सँगै लैजान प्रदेश सरकारले सहयोग गर्नुपर्छ ।”
मोटरेवल पुलसँगै अब यस क्षेत्रको सडकको उचित स्तरोन्नती गर्न प्रदेश सरकारले आगामी बजेटमा योजना समेट्ने समेट्नुपर्ने स्थानीयले माग राखेका छन् ।
