लमजुङ । लमजुङको दुर्गममा रहेको दुधपोखरी गाउँपालिकाका सयौं युवालाई नेपाल रेडक्रस सोसाइटी लमजुङले स्वरोजगार बनाउने भएको छ । युवाहरुलाई गाउँमै बसेर स्वरोजगार मुलक कार्य गर्नका लागि रेडक्रसले सहयोग पूजीँ दिएको हो ।
नेपाल रेडक्रस सोसाइटी जिल्ला शाखा लमजुङले दुधपोखरी गाउँपालिका अन्तर्गतका एक सय एक युवाहरुलाई व्यवसायिक उद्यमशीलताका लागि नगद सहयोग गरेको हो । जिल्लामा सञ्चालित डुफ परियोजना अन्तर्गत रेडक्रसले स्वरोजगारको सम्भावना बोकेका एकसय एक जना युवालाई जनही ३० हजारका दरले ३० लाख ३० हजार रुपैयाँ उपलब्ध गराएको छ ।
रेडक्रस जिल्ला शाखाका अध्यक्ष ऋषिराम घिमिरेले दुधपोखरी गाउँपालिका अध्यक्ष धनप्रसाद गुरुङलाई सो रकमको चेक हस्तान्तरण गर्नुभएको छ । गाउँपालिका अध्यक्ष गुरुङले रेडक्रसको यस सहयोगले पालिकाका युवाको भविष्य निर्माणका लागि प्रेरणादायक बनेको बताउनुभयो । “गाउँमा स्वरोजगार नहुँदा युवा विदेशिने लहर तीव्र छ । त्यस्तो समयमा उत्पादनमुलक काममा दिइएको सहयोगले ठूलो भरोसा दिन्छ”, उहाँले भन्नुभयो, “सहयोग पाएपछि युवाहरुले गाउँमै कृषि र पशुपालन जस्ता काम गरेर स्वरोजगार बन्ने अपेक्षा लिएको छु ।”
डुफ परियोजनाले वडा नं. १, २, ३ र ५ का १८ देखि ३० वर्ष उमेर समूहका युवालाई लक्षित गर्दै स्वरोजगारको बाटो खुलाउने उद्देश्य लिएको छ । व्यवसायिक सोच बोकेका तर स्रोत र पहुँच अभावमा थलिएका युवाहरुको क्षमता उजागर गर्न रकम वितरण गरिएको रेडक्रसका कार्यक्रम संयोजक गणेश गौलीले जानकारी दिनुभयो । युवाहरुले यो रकम कृषि र पशुपालनमा लगानी गरेर आत्मनिर्भर बन्न सक्ने उहाँले बताउनुभयो ।
परियोजना अन्तर्गत यसअघि रेडक्रसले दुधपोखरीका बाख्रापालक कृषकलाई व्यवसायिक तालिमसमेत दिएको थियो । परम्परागत शैलीमा पालिँदै आएका बाख्रालाई व्यवस्थित र ब्यवसायिक रुपमा सञ्चालन गर्न र आम्दानी बढाउन तालिमले सहयोग पुगेको थियो ।
रेडक्रसको यो कार्यक्रमले दुधपोखरी गाउँपालिकाको जिविकोपार्जन सुधारमा प्रत्यक्ष टेवा पुग्ने अपेक्षा गरिएको छ । गाउँपालिकाले पनि स्वरोजगारलाई प्राथमिकता दिँदै आएको अवस्थामा रेडक्रससँगको सहकार्यले थप गति दिएको गाउँपालिका अध्यक्ष गुरुङले बताउनुभयो । स्थानीय युवामा आशा र आत्मविश्वास थप्ने यो अभियानले दीर्घकालीन रूपमा गाउँमै रोजगारी सिर्जना गर्ने सम्भावना बोकेको रेडक्रसका उपमन्त्री दीपकराज न्यौपाने बताउनुभयो ।
