लमजुङ । पछिल्लो समय बैदेशिक रोजगारमा जानेको संख्या बढ्दो छ । रोजगारीका लागि विदेशिएका युवाहरु गन्तब्यमा पुगेपछि विभिन्न दुःख र पीडा खेप्दै आइरहेका समाचार आइरहन्छन् । विदेश पुग्दा तिनै दुःख र पीडा खोप्न नपरोस भन्ने उदेश्यले बेसीसहर नगरपालिकामा सुरक्षित बैदेशिक रोजगारी सम्बन्धी अभिमुखिकरण कार्यक्रम तिव्र बनाइएको छ ।
सुरक्षित आप्रवासन (सामी) कार्यक्रम अन्र्तगत बेसीशहरको ११ वटै वडाका स्थानीयहरुलाई सुरक्षित बैदेशिक रोजगार सम्वन्धी न्यूनतम सूचना र जानकारी प्रदान गरिएको जिल्लास्थित आप्रबासी श्रोत केन्द्रले जानकारी दिएको छ । बैदेशिक रोजगारीमा जान चाहने युवा तथा ंसंभावित व्यक्तिहरुलाई सहि सुचना कसरी लिने, रोगजारीका लागि जाँदै गर्दा के कस्ता कुरामा ध्यान दिनुपर्छ भन्ने विषयमा सुमदायमै पुगेर जानकारी दिने काम भइरहेको जिल्लास्थित आप्रबासी श्रोत केन्द्रका सुचना तथा परामर्शकर्ता ईश्वरबावु लोहनीले जानकारी दिनुभयो ।
मनोपरामर्शकर्ता सरला थापाका अनुसार बेसीशहर नगरपालिकाको वडा नं. १ को उदिपुर, सानोधिमिरे, ठुलोधिमिरे र नयागाँउ, वडा नं. ४ को पुरानकोट, ५ को नाल्मा, वडा नं. १० को बाझाखेत, ११ को रामचोकबेशी र चितीमा अभिमुखिकरण सम्पन्न भएको छ ।
आप्रवासी श्रोत केन्द्रका अनुसार करिव तीन वर्षको अवधिमा लमजुङमा बैदेसिक रोजगारीमा गएका ३४ जनाको मृत्यु भएको छ । आर्थिक वर्ष ०७९÷८० देखि चालु आर्थिक वर्षको माघ चैतसम्म ३४ जनाको मृत्यु भएको हो । कार्यालयको तथ्याङ्क अनुसार आर्थिक वर्ष २०७९÷८० मा १३ जनाको मृत्यु भएको थियो भने आर्थिक वर्ष ०८०÷८१ मा ११ जनाको मृत्यु भएको थियो । चालु आर्थिक वर्ष ०८१÷८२ को चैतसम्म आठजनाको मृत्यु भएको केन्द्रले जनाएको छ ।
सरकारले आप्रबासी श्रोत केन्द्र मार्फत बैदेसिक रोजगारीमा जाने तयारीमा रहेकाहरुलाई परामर्श सेवा दिँदै आएको छ । सुरक्षित आप्रवासन परियोजना (सामी) नेपाल सरकार र स्वीस सरकारबीच भएको द्विपक्षीय सम्झौता बमोजिम सन् २०१३ देखि कार्यान्वयन भइरहेको छ । नेपाल सरकारका तर्फबाट श्रम तथा रोजगार मन्त्रालय र हेल्भेटास स्वीस इन्टर कोअपरेसनले संयुक्तरुपमा लमजुङसहित देशका विभिन्न जिल्लाहरू छनोट गरी सो परियोजना कार्यान्वयनमा आएको हो ।
