लमजुङ । वरीपरी सेता हिमाल र डाँडाकाँडामा पालुवा चढेका हरिया बोटविरुवाले बेसीसहर बजार सुन्दर देखिन्थ्यो । तर, केही दिन यता विहानैदेखि ढाकिएको बाक्लो तुँवालोले सुन्दरता मात्र हराएको छैन, जनजीवन नै प्रभावित बनाएको छ ।
बेसीसहरको शेरा बजारमा दि टुकुचे पिक होटल सञ्चालन गरिरहनुभएका पर्यटन ब्यवसायी रामकुमार श्रेष्ठ यतिबेला निकै नै चिन्तित हुनुहुन्छ । उहाँको चिन्ता होटलको व्यावसायमा भन्दा पनि बेसीसहरको बिग्रँदो मौसमप्रति छ । लमजुङको आकास एकसातादेखि बिग्रिएको र त्यसले स्वास्थ्यदेखि नागरिकको दैनिकीमा असर परेको उहाँको गुनासो छ ।
लमजुङ सदरमुकाम बेसीशहर मात्र हैन यतिबेला सबैतिर तुँवालोले ढाकेको छ । घाम लागेको छैन, मौसम धुम्म बनेको छ । बेसीसहर नगरपालिकाकाको सहायक कम्युटर अधिकृत सुशिला श्रेष्ठले केही दिनदेखि लागेको तुँयालोले बेसीसहरको सुन्दरता हराएको बताउनुभयो । युनिभर्सल एकेडेमी बेसीशहरका प्रिन्सीपल बिमल अधिकारीले बिहानैदेखिको तुँवालोले आँखा पोल्ने गरेको बताउनुभयो । “राम्रोसँग आँखा हेर्न नै सकिदैन । पिरो भएर पोल्छ”, अधिकारीले भन्नुभयो, “बाहिर निस्किएर हिड्नै गाह्रो भएको छ ।”
तँुयालोले गर्दा लमजुङका विभिन्न पर्यटकिय गाउँहरु घुम्न आएका पर्यटकहरु समेत प्रभावित भएका छन् । “हिमाल हेर्न आएका पर्यटकहरु तुँयालोले गर्दा निराश बनेका छन्”, घलेगाउँ पर्यटन समितिका कर्मचारी दीर्घ घलेले भन्नुभयो, “सेता हिमाल तुयाँलोले ढाक्दा, गाउँ नै नराम्रो देखियो, पर्यटक पनि निराश भए ।”
तुँवालो घर भित्रै छिर्दा झनै समस्या भएको नागरिकको चिन्ता छ । सवारी चालकले आँखामा चश्मा लगाउने गरेका छन् । बटुवाले मास्क लगाएर हिँड्ने गरेका छन् । धेरैजना घरबाहिर निस्केका छैनन् । तिव्र रुपमा भैरहेका विकास निर्माण कार्य, बनजंगलमा लागेका ढडेलो र मुख्यगरि पश्चिमी वायुको प्रभावले तुँयालो बढिरहेको हुनसक्ने डिभिजन वन कार्यालय लमजुङका सूचना अधिकारी एवं वन अधिकृत सन्तोष खनालले बताउनुभयो । समयमा वर्षा भएमा तुँयालोको समस्या समाधान हुने उहाँले बताउनुभयो ।
प्रदेश अस्पताल बेसीसहरका प्रमुख डा. शिशिर देवकोटाले तुँवालोका कारण तत्कालै र दीर्घकालिन रुपमा स्वास्थ्यमा असर पर्ने बताउनुभयो । यस्तोबेला आँखा पोल्ने, स्वास्प्रश्वासमा समस्या हुने र एजर्जी हुने उहाँको भनाई छ । यस्तो समयमा सकेसम्म बाहिर ननिस्कन, निस्कन नै परेमा मास्क, चश्मा लगायत प्रयोग गर्न उहाँले सुझाव दिनुभयो ।
