लमजुङ जिल्ला अस्पतालमा पहिलो पटक निःशुल्क डाइलोसिस सेवा सुरु गरिएको छ ।
शुक्रबारदेखि अस्पतालमा डाइलाेसिस सेवा सुरू गरिएकाे अस्पताल प्रशासन प्रमुख हेमन्त श्रेष्ठले जानकारी दिए । पहिलाे दिन पहिलाे पटक एक ७० वर्षीया महिलामा उक्त सेवा सुरू गरिएकाे थियाे ।
पहिलो सेवा लिनेमा लमजुङकाे दोर्दी गाउँपालिका– ८ की ७० वर्षीया अनारुपि गुरुङ रहेकि छन् । अस्पतालका प्रशासन प्रमुख श्रेष्ठका अनुसार डाइलाेसिस सेवाका लागि अस्पतालमा कार्यरत चार जनाले त्यो सम्बन्धि तालिम लिएर आएका छन् ।
सो सम्बन्धी तालिम लिने जिल्ला अस्पतालका प्राविधिकहरूमा डा. इमल, डा. अञ्जु गुरुङ, अनिसा थापा र सुर्जना तामाङ रहेका छन् ।
त्यसैगरी, उनीहरूलाई सहयोग गर्न बागलुङ अस्पतालबाट बेलीसरा भुजेल र सावित्री बस्याल पनि जिल्ला अस्पताल लमजुङ आएका छन् । मेसिन जडान गर्न आएका इञ्जिनियरहरू शिशिर हुमागाई र गोमा अधिकारी पनि शुक्रबार विरामीसँगै सेवामा खटिएकाे श्रेष्ठले जानकारी दिए । उनका अनुसार शुक्रबार तीन घण्टा लगाएर ती महिलालाई डायलोसिसको सेवा दिइएको थियाे ।
अब अस्पतालमा दैनिक १० जनासम्मलाई डाइलाेसिस सेवा दिन सकिने अस्पतालले जनाएकाे छ । तर, सुरूका केही दिन अस्पताल कर्मचारीहरूकाे दक्षता हाँसिल नगर्दासम्म दैनिक एक जनाका दरले सेवा दिने श्रेष्ठले बताए । मृगाैला राेगीहरूलाई सरकारले डायलोसिस सेवा निशुल्क गरेकाे छ ।
उक्त डायलोसिस मेसिन गण्डकी प्रदेश सरकारबाट अनुदान स्वरुप जिल्ला अस्पतालमा दिइएकाे हाे । यसअघि विरामीहरू डाइलाेसिस सेवा लिन तनहुँकाे दमाैलीसहित विभिन्न सहरका अस्पताल जाने गरेका थिए ।
