लमजुङ । लमजुङको मर्स्याङ्दी गाउँपालिका-९ सिरूवारीका एप्लाष्टिक एनिमिया रोगबाट पीडित विश्वराज अधिकारीको उपचारार्थ प्रवासबाट आर्थिक सहयोग प्राप्त भएको छ । एप्लाष्टिक एनिमियाबाट ग्रस्त भई बोनम्यारो प्रत्यारोपण गर्नुपर्ने भएपछि शिक्षण अस्पताल काठमाडौंमा उपचारार्थ रहनुभएका २२ वर्षिय अधिकारीलाई हाल जापान र मकाउमा रहनुभएका युवाले आर्थिक सहयोग जुटाएर पठाउनु भएको हो ।
अधिकारीको उपचारका लागि मर्स्याङ्दी-९ पामचोक स्थायी ठेगाना भई हाल जापानमा रहनुभएका समाजसेवी युवा कुमार भण्डारी र श्रीमती सरिता शाहीको संयोजकत्वमा अर्थ संकलन गरिएको हो । कुमारको संयोजकत्वमा त्यहाँ रहनुभएका ४० जना भन्दा बढि ब्यक्तिहरूसंग संकलन गरि एक लाख चार हजार ९८ रूपियाँ संकलन गरि पीडितलाई पठाउनुभएको हो । जापानमा संकलित एक लाख ११ हजार ५० येनको नेपाली रूपान्तरित एक लाख चार हजार ९८ रूपियाँ पीडित विश्वराजकी आमा शान्ता अधिकारीलाई हस्तान्तरण गरिएको छ ।
मर्स्याङ्दी गाउँपालिका-९ का सहायक सचिव शैलेन्द्र घिमिरे मार्फत पठाउनु भएको सो सहयोग रकम वडाअध्यक्ष हरिश्चन्द्र थापाले पीडित परिवारलाई हस्तान्तरण गर्नुभएको हो ।
यसैगरि कुमारका भाइबुहारीद्वय जनक भण्डारी र शारदा पराजुलीले मकाउमा सहयोग संकलन गरि पीडित परिवारलाई पठाउनु भएको छ । लमजुङ सेवा समिति मकाउका सल्लाहकार समेत रहनुभएका जनकले एक लाख ८२ हजार ९ सय ४६ रूपियाँ सहयोग संकलन गरि पठाउनु भएको हो ।
मकाउमा रहनुभएका ८१ जनाबाट संकलित सहयोग रकम काठमाडौंमा जनकका दाजु विश्वराज भण्डारीले पीडित परिवारलाई हस्तान्तरण गर्नुभएको छ ।
लमजुङमा राजनीतिक तथा सामाजिक क्षेत्रमा क्रियाशील कुमारले यसअघि मर्स्याङ्दी गाउँपालिका(३ पल्लोटारीका पहिरो पीडितलाई १९ लाख सहयोग संकलन गर्नुभएको थियो ।
एप्लाष्टिक एनिमियाबाट ग्रस्त भई बोनम्यारो प्रत्यारोपण गर्नुपर्ने अबस्थामा रहनुभएका विश्वराज अधिकारीको उपचारमा हालसम्म ६० लाख भन्दा बढी खर्च भएको उहाँको आमा शान्ता अधिकारीले बताउनुभयो । अब बोनम्यारो प्रत्यारोपण गर्न करिब ३५ लाख जति रकम चाहिने भएकोले सहयोगको अपिल गरिएको उहाँले बताउनुभयो ।
बोनम्यारो भनेको मानिसको शरीरमा भएको भित्री मासी हो, जुन हड्डीभित्र रहेको हुन्छ । यही ठाउँमा रातो, सेतो रगत एवं प्लेटलेट्स बन्छ। अर्थात् शरीरलाई चाहिने रगत
बन्ने ठाउँ नै बोनम्यारो हो। यो हड्डीभित्र हुन्छ।
तर, कहिलेकाहीँ यो रगत बन्ने बोनम्यारोमा खराबी आउँछ वा क्यान्सर हुन्छ, त्यसपछि मानिसको शरीरमा रगत बन्न सक्दैन। अनि यस्तो अवस्थामा त्यही खराब भएको बोनम्यारोलाई किमोथेरापीमार्फत सुकाएर अर्को बोनम्यारो प्रत्यारोपण गर्नुपर्छ। त्यही बोनम्यारो फेर्ने प्रक्रिया नै बोनम्यारो प्रत्यारोपण हो। यो बोनम्यारो प्रत्यारोपण पनि विभिन्न किसिमले गर्न सकिन्छ ।
