गठबन्धनबाट लमजुङमा मै उमेदवार हुन्छु : महासचिव गुरूङ

नेकपा (माओवादी केन्द्र) का महासचिव देवप्रसाद गुरुङले  सत्ता गठबन्धनका तर्फबाट आफुँले लमजुङबाट प्रतिनिधिसभामा उमेदवारी दिने बताएका छन् ।

गठबन्धन र सहकार्यकै मोडेलमा चुनावमा जाने पाँच दलिय गठबन्धनले निश्चत गरेको उनले बताए । प्रेस सेन्टर नेपाल, लमजुङले शुक्रबार लमजुङ कृषि क्याम्पस सुन्दरबजारमा आयोजना गरेको पत्रकार भेटघाट तथा अन्तरक्रिया कार्यक्रममा बोल्दै महासचिव गुरुङले आउँदो मंसिर ४ गते हुन गइरहेको प्रतिनिधि सभा तथा प्रदेश सभा सदस्य चुनावमा आपसमा सहकार्य गरी चुनावमा जाने आफ्नो पार्टीका साथै पाँच दलिय गठबन्धनले निश्चित गरिसकेको बताए ।

प्रत्यक्षतर्फका उम्मेदवारको सन्दर्भमा अधिकांश सीटमा सहमति जुटिसकेको उनले बताए । ‘शीर्ष नेताहरुले माइन्युट गरी सिग्नेचर गरिसकेको अवस्था त छैन,’ उनले भने, ‘तर कार्यदलको एक सदस्यको हैसियतले कार्यदलमा चलेको गृहकार्यका आधारमा एउटा मापदण्डका आधारमा प्रत्यक्षतर्फका ८० प्रतिशत भन्दा बेसी सीटमा सर्वसहमति देखिन्छ । खासै विमति देखिदैँन । केही १०/१५ प्रतिशत सीटमा नेताहरुबीचमा गृहकार्य गर्नुपर्ने, छलफल गर्नुपर्ने गिभ एण्ड टेक गर्नुपर्ने खालका कुरा बाँकी छन् ।’

लमजुङको हकमा अबको चुनावमा प्रतिनिधिसभातर्फ आफुलाई अघि बढ्न प्रस्ताव भएको र दुवै प्रदेश सभामा कांग्रेसका उम्मेदरवालाई अघि बढाउने पाँच दलको कार्यदल स्तरमा सहमति भएको महासचिव गुरुङले उल्लेख गरे।

जन्मथलो मनाङ भएतापनि आफ्नो कर्मथलो लमजुङ भएको र लमजुङले एउटा पार्टीका महासचिवको जिम्मेवारी पाएको उल्लेख गर्दै यो जिम्मेवार, अवसर समग्र जिल्लाको विकास र समृद्धिका लागि उपयोगी हुनसक्ने उनले बताए।

प्रेस सेन्टर नेपाल, लमजुङका अध्यक्ष रविन्द्र लामिछानेको अध्यक्षतामा भएको पत्रकार भेटघाट कार्यक्रममा गण्डकी प्रदेशका स्वास्थ्य तथा जनसंख्या मन्त्री मधु अधिकारी गुरुङ, नेकपा माओवादी केन्द्रका केन्द्र, प्रदेशका साथै जिल्ला स्तरका नेताहरुको उपस्थिती रहेको थियो ।