लमजुङ । संरक्षण क्षेत्रमा मिचाहा (आक्रामक) प्रजातिका वनस्पतिको प्रकोप बढ्न थालेको छ । वनपाखा तथा खेतबारीमा मिचाह प्रजातीका झारहरु बढ्न थालेपछि संरक्षणकर्मी र स्थानीय समुदाय चिन्तित बनेका छन् ।
मिचाहा वनस्पतिले जैविक विविधता र मौलिक वनस्पतिको अस्तित्वमा खतरा उत्पन्न भएको भन्दै अन्नपूर्ण संरक्षण क्षेत्र आयोजना (एक्याप) कार्यालय लमजुङले समुदाय स्तरमा सचेतना र नियन्त्रणका कार्यहरु गर्न थालेको छ । गण्डकी जलाधार जलवायु उत्थानशील आयोजनाको सहयोगमा संरक्षण क्षेत्र व्यवस्थापन समितिहरुसँग मिलेर मिचाहा वनस्पति प्रजातिको व्यवस्थापन र नियन्त्रणमा जुटेको इलाका संरक्षण कार्यालय भुजुङका प्रमुख प्रमोद रेग्मीले जानकारी दिनुभयो । जंगलमा फैलिदो क्रममा रहेको वनमारा र गन्धे प्रजातिको प्रभाव कम गराउने र सचेतना फैलाउने उदेश्यले समुदायसँग मिलेर काम गरिएको उहाँले बताउनुभयो । समुदायमा मिचाह प्रजातिको नियन्त्रण तथा ब्यवस्थापन सम्बन्धी तालिम र नियन्त्रणका कार्यहरु समेत गरिएको रेग्मीले बताउनुभयो ।
मस्र्याङ्दी गाउँपालिका वडा नं. २ घनपोखरा, वडा नं. ३ खुदी, वडा नं. ४ ताघ्रिङ, वडा नं. ९ सिम्पानी र क्व्होँलासोथार गाउँपालिका पुरैमा अन्नपूर्ण संरक्षण क्षेत्र आयोजनाले काम गर्दै आएको छ । यहाँ रहेका स्थानीय संरक्षण समितिलाई मिचाह प्रजाति ब्यवस्थापन सम्बन्धी तालिम दिनुको साथै प्रभाव कम गराउने काम गरिएको एक्यापका संक्षण अधिकृत बासुदेव न्यौपानेले जानकारी दिनुभयो । स्थानीय समुदायको सक्रिय सहभागितामा केही स्थानमा मिचाहा झारहरू उखेलेर हटाउने कार्यसमेत सुरु गरिएको छ ।
गण्डकी जलाधार जलवायु उत्थानशील आयोजना कार्यक्रम १९ जिल्लामा सञ्चालनमा रहेको छ । संरक्षण क्षेत्रमा देखिएको मिचाह प्रजातिका बनस्पतिलाई आगामी दिनमा विक्रेट, मल आदि बनाएर यसको नियन्त्रण र ब्यवस्थापन गर्नका लागि समुदायलाई तयारी बनाउन सुरुवात गरिएको न्यौपानेले बताउनुभयो ।
मिचाह बनस्पतिको प्रकोपले स्थानीय बनस्पति तथा चराचुरुङ्गीको बासस्थान अतिक्रमण गर्ने र भूमिको उर्वरता घटाउने गरेको संरक्षणकर्मीहरु बताउँछन् । मस्र्याङ्दी–९ सिम्पानीको संरक्षण समतिकिा अध्यक्ष रामबहादुर थापाले मिचाहा प्रजातिका कारण खेतीपातीमा असर परेको र मौलिक बनस्पति हराउँदै गएकाले यसलाई समयमै नियन्त्रण गर्न आवश्यक रहेको बताउनुभयो । सरकार, संरक्षण संस्था तथा स्थानीय समुदायबीचको सहकार्यले मिचाहा प्रजातिका बनस्पतिको विस्तार नियन्त्रण गर्न सकिने उहाँले बताउनुभयो ।
