लमजुङ । नेपाली कांग्रेसका उपसभापति विश्वप्रकास शर्माले वर्तमान जटिल परिस्थितिमा देशलाई सही दिशामा लैजान सक्षम नेतृत्व रोज्न मतदातालाई आग्रह गर्नुभएको छ । नेपाली काँग्रेस लमजुङको आयोजनामा सदरमुकाम बेँसीशहरमा सोमबार भएको चुनावी सभालाई सम्बोधन गर्दै उहाँले चुनाव केवल दलको जित–हारको विषय नभई देशलाई संकटबाट निकास दिने क्षमताको परीक्षण भएको बताउनुभयो ।
शर्माले भन्नुभयो, “मूल प्रश्न कुन दलले जित्ने भन्ने होइन, मूल प्रश्न विषम परिस्थितिमा देशलाई कसले संयमका साथ समन्वय गर्न सक्छ, कसले परिपक्व ढंगले गाँस्न सक्छ र हाँक्न सक्छ भन्ने हो ।” उहाँले ऐतिहासिक तथ्यका आधारमा काँग्रेसले मुलुकलाई सही ढंगले अघि बढाएको उदाहरण जनतामाझ लैजान आग्रह गर्नुभयो । उहाँले इतिहासका विभिन्न मोडमा नेपाली काँग्रेसले देशभित्रका भिन्न शक्ति, दल र समुदायबीच समन्वय गरेर देशलाई निकास दिने भूमिका खेलेको दाबी गर्नुभयो । अहिलेको बदलिँदो अबस्था र पुस्ताबीच पनि समन्वय गर्दै देशलाई नयाँ विश्वासको चरणमा लैजान सक्ने क्षमता काँग्रेससँग रहेको उहाँको भनाइ थियो ।
उपसभापती शर्माले २००७ सालको प्रजातान्त्रिक आन्दोलनदेखि २०७० सालको संविधानसभा निर्वाचनसम्मको उदाहरण प्रस्तुत गर्दै भन्नुभयो, “२००७ सालको क्रान्तिपछि राणालाई मिलाउने कुरा, २०१५ सालपछि सबैलाई समेट्ने कुरा, पञ्चायत ढालेपछि राजालाई मिलाउने कुरा चानचुने थिएन् । लमजुङका मुक्ति अधिकारी जस्ता हजारौं मानिस मारिदाँ पनि माओवादीलाई मिलाएर ल्याएको दल काँग्रेस हो । २०६४ मा अहिलेको जस्तै हुरी चल्दा काँग्रेस दोस्रो दल बन्यो, चार वर्ष खेर गयो, देशले संविधान पाएन । २०७० मा काँग्रेस पहिलो दल बनेपछि दुई वर्षमै संविधान आयो । यो कुरा जनतालाई बुझाउनुपर्छ ।”
उहाँले मतदातालाई गम्भीर भएर निर्णय लिन आग्रह गर्दै प्रश्न गर्नुभयो, “२०६४ जस्तै गल्ती दोहोर्याउने कि २०७० जस्तै विवेक पु¥याउने ?” आजको मुल प्रश्न कुन दलले जित्ने भन्ने होइन, मुल प्रश्न विषम परिस्थितिबाट देशलाई नवीन निकासमा कसले पुर्याउन सक्छ भन्ने रहेको उहाँको भनाइ छ । उहाँले जेनजी आन्दोलनपछिको आवेग र उत्तेजनालाई शान्तिमा ढालेर समाजलाई गाँसेर अघि बढ्न कांग्रेसलाई मत दिनुर्ने बताउनुभयो ।
अबको देशमा आशन, शासन र भाषण सुधार्ने गरी काँग्रेस अघि बढेको उहाँले बताउनुभयो । उहाँले भन्नुभयो, “अब काँग्रेस एउटै ब्यक्तिले मात्र अबसर पाउने छैन् । दुईपटक भन्दा बढी प्रधानमन्त्री हुन पाइँदैन, अब सक्ने कुरा मात्र बोल्छौं, गर्नसक्ने मात्र गर्छौं । कसैलाई गाली गर्दैनौं ।” कांग्रेस यतिबेला सभापति गगन थापालाई प्रधानमन्त्री बनाउने अभियानमा लागेको बताउँदै उहाँले भन्नुभयो, “त्यही अभियानको लहरमा लमजुङ पनि मिसिनेछ । देशलाई नवीन सपनामा, नवीन मार्गमा लैजानुछ । यदी सही ढंगले देशलाई अघि बढाउन सकेनौ भने अहिले जेनजी विद्रोह भयो, १० वर्षपछि फेरी अल्फाको विद्रोह हुनेछ । हामी त्यो अबस्था बन्न दिने छैनौं ।”
चुनावी सभामा काँग्रेसका उम्मेद्वार गमप्रसाद गुरुङ, पूर्व केन्द्रीय सदस्य दिलबहादुर घर्ती, जिल्ला सभापति एवं गण्डकी प्रदेशका अर्थमन्त्री डा. टकराज गुरुङ, जिल्ला सचिव आनन्द घिमिरे, कोषाध्यक्ष सृजना गुरुङ, तरुण दल लमजुङका अध्यक्ष कुमराज गुरुङ (भुपेश) लगायतले मन्तब्य राख्नुभएको थियो ।
