लमजुङ । नेकपा एमाले लमजुङले स्थानीय निर्वाचनमा निर्वाचित पूर्व जनप्रतिनिधि तथा उम्मेदवारहरुलाई सम्मान गरेको छ ।
३२ औं मदन आश्रित दिवसका दिन शनिवार सदरमुकाम बेसीसहरमा आयोजित नेकपा एमालेको नवौं जिल्ला अधिवेशन प्रतिनिधि परिषदको प्रथम बैठकको अबसरमा पूर्व जनप्रतिनिधि तथा उम्मेदवारहरुलाई सम्मान गरिएको हो ।
२०४३ सालका जनपक्षिय उम्मेदवार, २०४९ र २०५४ को स्थानीय निर्वाचिनमा एमालेबाट निर्वाचित गाउँ विकास समितिका अध्यक्ष, उपाध्यक्ष र अध्यक्ष तथा उपाध्यक्षका उम्मेद्वारहरुलाई सम्मान गरिएको हो । सो बेला निर्वाचित र उम्मेदवार बनेर पराजित हुनुभएका करिब दुईसय जनालाई सम्मान गरिएको नेकपा एमाले लमजुङका अध्यक्ष राजकुमार विष्टले जानकारी दिनुभयो ।
नेकपा एमालेका वरिष्ठ उपाध्यक्ष ईश्वर पोखरेल, नेकपा एमालेका उपमहासचिव एवं संञ्चार तथा सूचना प्रविधिमन्त्री पृथ्वीसुब्बा गुरुङ, नेकपा एमालेका केन्द्रीय सदस्य तथा लमजुङ इन्चार्ज जमीन्द्रमान घले र जिल्ला अध्यक्ष राजकुमार विष्टले संयुक्त रुपमा सम्मानपत्र, खादा र टिका लगाएर सम्मान गर्नुभएको हो ।
पूर्व जनप्रतिनिधिलाई पार्टीको नीतिअनुसार समाजवादउन्मुख समृद्ध नेपालको आधार निर्माण गर्ने कार्यमा उल्लेखनीय योगदान पु¥याएको र पार्टी निर्माणमा विगतमा देखाएको क्रियाशीलता, योगदान र समर्पणको उच्च मूल्याङ्कन गर्दै सम्मान गरिएको नेकपा एमालेका केन्द्रीय सदस्य एवं लमजुङ इञ्चार्ज जमीन्द्रमान घलेले बताउनुभयो ।
विगतमा गरेको योगदानको पार्टीले सम्झेर सम्मान गरेकोमा पूर्व जनप्रतिनिधिहरु खुसी भएका थिए । हाल दोर्दी गाउँपालिका– ७ घर भई तत्कालिन फलेनी गाउँ विकास समितीमा २०४९ सालमा उपाध्यक्षमा निर्वाचित टकबहादुर गुरुङले पार्टीले सम्झेर सम्मान गरेकोमा धेरै खुसी लागेको बताउनुभयो । गुरुङले जस्तै धेरै सम्मानित व्यक्तिहरुले सम्मान गरेकोमा खुसी व्यक्त गर्नुभयो ।
२०४९ र २०५४ मा दुई पटक साविक उत्तरकन्य गाविसको अध्यक्षमा निर्वाचित तथा हालको क्व्होँलासोथार गाउँपालिकाका निवर्तमान अध्यक्ष समेत रहनुभएका प्रेम घलेले जनप्रतिनिधिलाई सम्झेर सम्मान गरेकोमा पार्टीको राम्रो कामको थालनी गरेको बताउनुभयो । सो अबसरमा निर्वाचित तथा उम्मेदवार मात्र बनेर निधन भएकाहरुलाई पनि मरोणोपान्त समेत सम्मान गरिएको थियो ।
कार्यक्रममा नेकपा एमाले केन्द्रीय अनुशासन आयोगका सदस्य मायानाथ अधिकारी, नेकपा एमाले गण्डकी प्रदेशका सचिव धनञ्जय दवाडी लगायत प्रदेश कमिटीका सदस्य, जिल्ला कमिटीका पदाधिकारी, सदस्य र प्रतिनिधि परिषदका प्रतिनिधिहरुको सहभागिता थियो ।
