लमजुङ । संरक्षणको पर्खाइमा जिर्ण अबस्थामा रहेको लमजुङको ऐतिहासिक पुरानकोट गढीको नेपाली सेनाले मर्मत सुरु गरेको छ । लमजुङको उदिपुरमा हरेको चण्डीप्रसाद गणले बेसीशहर नगरपालिका–४ मा रहेको ऐतिहासिक पुरानकोट गढीको मर्मत सुरु गरेको हो ।
सेनाले पुरातत्व विभागबाट गरिएको डिजाइन स्टमेट र सेनाको पश्चिम पृतना पोखराबाट प्राप्त श्रमदान बाहेकको आर्थिक स्टिमेटको आधारमा जिर्ण गढीको मर्मत सुरु गरेको हो । गढी मर्मतका लागि नेपाली सेनाका १३ सदस्यीय टोली खटिएको चण्डिप्रसाद गणका गणपती प्रमुख सेनानी चित्रकुमार कार्कीले जानकारी दिनुभयो । गत माघ २८ गतेदेखि सेनाको टोलीले गढी मर्मत गरिरहेको प्रमुख सेनानी कार्कीले बताउनुभयो ।
गणका सेनानी राजेन्द्र अर्यालकाअनुसार अहिले गढीको पुरानो पर्खालका ढुङ्गाहरु जगबाटै निकाल्ने र कुँदेका ढुङ्गाबाट पर्खालसहितका संरचना निर्माणका काम भैरहेको छ । जिल्लामा रहेका अन्य ऐतिहासिक, धार्मिक तथा पुरातात्विक महत्वका दरबार, गढी, किल्ला र पदमार्गहरुको संरक्षण तथा सम्वद्र्धनका लागि मर्मत कार्यलाई निरन्तरता दिईने सेनाले जनाएको छ । जिल्लामा रहेका दरबार, गढी, किल्लाहरुको ऐतिहासिक दस्तावेज संकलन, अभिलेखिकरण, संरक्षण र संवद्र्धनको लागि मासिक रुपमा विशेष कार्यक्रम सञ्चालन गर्दै आएको सेनाले जनाएको छ ।
ऐतिहासिक गढी जिर्ण भएपनि केहि वर्षअघि बेसीशहर नगरपालिकाले सो स्थानलाई ऐतिहासिक पर्यटकिय गन्तव्यको रुपमा विकास गर्न स्तुपा सहितको भ्यु टावर निर्माण गरेको थियो । नगरपालिकाले स्तुपा सहितको भ्यु टावर निर्माण गरेपछि आन्तरिक तथा बाह्य पर्यटक आगमन बढ्न थालेको स्थानीयले बताएका छन् ।
तत्कालिन शाह बंशिय राजाहरुले शासन गरेको लमजुङको गाउँशहर दरबार नजिकै रहेको पुरानकोट गढी आँफैमा ऐतिहासिक पर्यटकिय गन्तव्य हो । पुरानकोट गढीको तत्कालिन लमजुङे राजाहरुको अस्थायी दरवार थियो । नेपालका बाइसे–चौबिसे राजाको पालामा बनेको उक्त गढीमा निर्माण गरिएको संरचना हेर्न, तथा सो क्षेत्रबाट आसपासका प्राकृतिक दृश्य नियाल्न यतिबेला पर्यटकको आगमन बढ्दो छ ।
स्थानीय काउलेपानी होमस्टेका सञ्चालक एवं शिक्षक देवबहादुर गुरुङकाअनुसार स्तूपा तथा भ्यू टावर वरपर कालु शाहकी रानीको दरबार रहेको सो स्थानलाई यशोबह्म शाहको पालादेखि पुरानोकोट गढीका रुपमा स्थापित हुँदै आएको छ ।
