लमजुङ । गत भदौ २३ र २४ गते भएको जेनजी आन्दोलनपछि क्रियाशिल युवाहरुको एक समूहले लमजुङमा भ्रष्ट्राचार विरुद्ध स्वतन्त्र जागरण अभियान सञ्चालन गरेको छ ।
स्वतन्त्रता, जनचेतना र भ्रष्टाचारविरुद्धको सन्देश फैलाउने उद्देश्यसहित युवाहरुले ‘स्वतन्त्र नागरिक जागरण अभियान’ सञ्चालन गरेका हुन । अभियान अन्र्तगत शनिबार र आइतबार जिल्लाका आठवटै पालिकामा जागरण अभियान सञ्चालन गरिएको अभियानकर्ता राजन परियारले जानकारी दिनुभयो । अभियानलाई आगामी दिनमा विभिन्न स्थानमा सञ्चालन गर्दै जाने उहाँले बताउनुभयो ।
अभियानको पहिलो दिन शनिबार सुन्दरबजार नगरपालिका, राइनास नगरपालिका, दोर्दी गाउँपालिका र दुधपोखरी गाउँपालिकामा भ्रष्ट्राचार विरुद्ध नागरिकहरुसँग संवाद तथा जागरणसभा सञ्चालन गरिएको थियो । आइतबार मध्यनेपाल नगरपालिका, बेंसीसहर नगरपालिका, क्व्होलासोँथार गाउँपालिका र मस्र्याङ्दी गाउँपालिकामा नागरिकसँग प्रत्यक्ष संवाद गरिएको थियो ।
अभियानको संयोजन ‘लमजुङ सेवा शक्ति’ नामक युवाहरूको समूहले गरेको गरिरहेको छ । स्थानीय तहदेखि केन्द्रसम्म मौलाएको भ्रष्टाचारप्रति खबरदारी गर्दै आम नागरिकलाई सचेत बनाउन अभियानले भूमिका खेलेको अभियानका संयोजक हरि पौडेलले बताउनुभयो ।
जेनजी आन्दोलनपछि स्वतन्त्र युवाहरुको अभियान सञ्चालन गर्न जापानमा रहनुभएका बेंसीसहर उदिपुरका अंशुल लोहनीलायतका युवाहरुले सामाजिक सञ्जालमा जागरण अभियान चलाउनुभएको थियो । लमजुङ सेवा शक्तिमा आवद्ध युवाहरुले दशैंका बेला लमजुङ तनहुँ सिमा क्षेत्र पाउँदी बजारमा यात्रुहरुलाई सहायताको काम पनि गरेका थिए ।
‘लमजुङ सेवा शक्ति’ ले यो अभियानलाई आगामी निर्वाचनसम्म निरन्तरता दिने जनाएको छ । जिल्लाको समग्र विकासका लागि नयाँ, स्वतन्त्र र उत्तरदायी नेतृत्वको खोजी अभियान पनि जारी राख्ने अभियानकर्ताहरुले बताएका छन् ।
अभियाननले लमजुङको राजनीतिमा नवीन सोच र युवाको संलग्नतालाई बढाउने र भ्रष्टाचारविरुद्ध नागरिकहरुमा जागरण ल्याउने अभियानका संयोजक पौडेलले बताउनुभयो ।
